నమ్మకమనేది
బతుకు దుకాణంలో
హృదయ తీరంలో దొరికే
అతి విలువైన వస్తువు…

నిజమనేది
కళ్ళు మనసు లోతును
ఈది చేరుకునే
ఓ సురక్షిత ప్రమాణం…

మనసు
ఓ చీకటి గదిలో
సంచరించే రహస్య సంచారి..
నచ్చిన రాకతో వెలిగే పచ్చని దీపం

నచ్చడం అంటే
మెచ్చుకోవడం కానే కాదు.
తన మనసు పోలికలను
జత చేసుకునే ఓ ఊహ

వంద అడుగుల్లో
ఒక్క అలుపు చెప్పే మాట
ఇంకో అడుగు అప్పు తీసుకుని
ముందుకు పొమ్మని .

నిద్ర రాలేదంటే
ఏదో ఒక ఆలోచన మధ్య
మనసు  ఇరుక్కుని
నలగడమే

ఓ పరిచయం భారీవర్షంలా
మాటల వరదలో
కొట్టుకుపోతూ
నమ్మకం గల్లంతు

అసహ్యంగా కనిపించే
మనసును పుస్తకంగా చదివితే
ప్రతి అక్షరం
ఓ అందమైన రహస్యమే

బాగా పాచి పట్టిన
అనుభవంపై
కాలు పడ్డప్పుడలా
విరిగిన వాక్యమే గొప్ప కవిత.

రోజంతా ఊపిరాడని
అలసటకు
అచ్చు తప్పుపడ్డ పదాలు
కూర్చిన అర్థమే ఔషధం.

… చందలూరి నారాయణరావు

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~