“పువ్వుల్ని పుష్పించనీ…”(కవిత)- బాలాజీ పోతుల

అస్పృశ్యమైన వాడల్లో పుట్టి

పూసిన పూలన్నీ

పూజకి పనికొస్తాయా?

ఎందుకో ఈరోజు పూలు,

నిన్నటి కంటే ఎక్కువే పుష్పించాయి

యేసుకి పూలొద్దు,

వాటిని తుంచటమే అయిష్టం తనకి!

ఎక్కడ బోయీ

ఈ ముప్పై మూడు కోట్ల దేవతలకేనా ఈ పుష్పాలన్నీ?

రోజూ వికసిస్తూ ఉండాల్సిన పూలు,

ఇలా ఏ దైవ సన్నిధిలోనైనా

మరుసటి రోజుకి

ఇంకొన్ని పూలొచ్చి

ఆ చోటుకి చేరేలోపే

ముందున్న పూలన్నీ

ఆ ఒక్క రోజుకే వాడిపోతాయి!

తుంచమనీ ఏ దేవుడూ చెప్పలేదు,

దేవుడి పాదాల చేరని పుష్పాల

జన్మ విఫలమని గగ్గోలు పెట్టిందెవ్వరు?

వాడ్ని తెగ్గొయ్యండి

వాడ్ని అర్పించండి ఆ దేవుడి పాదాలకి!

పుష్పాలు కిలకిల నవ్వే ఆనందభాష్పాలు,

తనకి తానుగా నేలరాలనివ్వండి

మధ్యలోనే తుంచి హత్యాపాతకాన్ని చుట్టుకోవద్దు చెప్తున్నా!

అంతా ఆ ప్రకృతే చూసుకుంటుంది,

ఏ పువ్వుని ఎక్కడికి చేర్చాలో

ఏ ముల్లును ఎక్కడ పెట్టాలో

మనమెంత ఆ ప్రకృతి దేవత ముందు!

— బాలాజీ పోతుల

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

విహంగ మహిళా సాహిత్య పత్రిక (A Monthly Peer-Reviewed Online Telugu Journal)