ఓరుగల్లు దిక్కారాన్ని పునికి పుచ్చుకున్న
ఉద్యమ కెరటానివి నువ్వు..
తాడిత పీడిత గుండెల్లోంచి పెళ్లుబుకిన
నల్ల మబ్బువి నువ్వు..
అణగారిన వర్గాల కోసం అలుపెరుగని
అక్షర సేద్యం నీది..
ఆధిపత్యపు నీడల నీతులకు నీరుగారిన
సగం ఆకాశానికి ప్రేరణ నింపిన
చెమట చెట్టువి నువ్వు..!

తొవ్వనిండా అలుముకున్న
ఎగుడు దిగుడు జాడల నీడలను కూల్చేందుకు
నువ్వో ఎక్కుపెట్టిన శరం..అక్షరం

ఆచార్య జయశంకర్సార్ అడుగుజాడల్లోంచి
ఉబికి వచ్చిన ఉద్యమ దీపికవి
ప్రజాకవి కాలోజీ కలల్లోంచి ఎగిసిన నిప్పురవ్వవి
నువ్వు మా అనిశెట్టి రజితవి

ఓ జ్వలిస్తున్న గులాబీ..
నీ అంతర్గత గానం, నీ ప్రయాణం
పదిమందిని కలుపుకుపోయే
ప్రజాస్వామ్య భావజాలం
అది మాకెప్పటికీ తొవ్వ చూపే
దారి దీపం..
పుట్టుక మన చేతుల్లో లేకున్నా..
జీవించడం మన వంతేనని నమ్మిన
నిర్భయాకాశానివి.
రజితక్కా.! నిజంగా నువ్వెంత నిస్వార్థ జీవివి,
ఎంతటి మహోపకారం నీది !!
నీ పార్ధివదేహాన్ని సైతం
వైద్య విద్యార్థుల పాఠానికి అంకితమిస్తివి..!
నీ నేత్రాలు ఇంకొకరి దేహంలోంచి
చూస్తూనే ఉన్నాయి
ఓ జ్ఞానదాతా..!
నీ ఖ్యాతి ఎప్పటికీ అజరామరణం
నీకు జోహార్ జోహార్

– నాంపల్లి సుజాత అన్నవరం

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~