పనికి పండగ లేదని
కాలెండర్‌లో “ఎరుపు రంగు”
కష్టానికి మాత్రమే ఎందుకు
శ్రమ నడిచే ప్రతి రోజు పండగే.!!

శ్రమకు సెలవు లేదు
సూర్యుడి ముందు లేచి
నక్షత్రాల కింద పడుకునే
వాళ్ల జీవితమే నిరంతర యజ్ఞం.!!

చేతుల మీద మట్టీ
నుదిటిపై చెమట
ఇవే వారి పతకాలు
వీటితోనే చరిత్ర రాయబడుతుంది.!!

“ఆకలి” అడిగిన ప్రశ్నలకు
శ్రమ ఇచ్చిన “జవాబు”
పళ్ళెంలో అన్నమై
కుటుంబ జీవనానికి ఆధారమై.!!

గడియారం కొట్టే గంటలు కాదు
పనితో కొట్టే గుండె చప్పుడు
రోజులను లెక్కపెడుతుందని
అదే వారి కాలమానం.!!

సెలవు అనే మాట
వాళ్ల నిఘంటువులో లేదు
విశ్రాంతి కూడా
పని మధ్యలో పుట్టిన శ్వాస మాత్రమే.!!

పండగ వస్తే
వాళ్ల చేతులే అలంకరణ
పూలకంటే ముందు
వాళ్ల శ్రమే వేదిక సిద్ధం చేస్తుంది.!!

రేపటి ఆశ
నేటి శ్రమ మీదే నిలబడి
పిల్లల కలలకు
వాళ్లే మౌన శిల్పులు.!!

ఎవ్వరూ చప్పట్లు కొట్టరు
ఎవ్వరూ దండ వేయరు
కానీ దేశం నడిచేది మాత్రం
వాళ్ల అడుగుల మీదే.!!

పనికి పండగ లేదన్నా
శ్రమకు సెలవు లేదన్నా
ఇదే వారి గర్వం
ఇదే మనకిచ్చిన వరం.!!

-డాక్టర్. ఆరాల లింగమల్లు

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~`